BE 01 - RINGGAS MA HO TONDIKKU


VERSE 1

Ringgas ma ho tondingku mamuji Debatanta i
Ai diparmudumudu ho unang halupahon i
Disesa do dosamu, didaoni sahitmi,
diudut do hosamu, diburi tondimi
Huhut diapulapul roham na marsak i
Asa tung lam humibul mingot uhumNa i

VERSE 2

Na tolhas do tu hita uhumNa na sumurung i
Dibaen holong rohaNa Di angka na porsea i
Ai ndada dilaluhon tu hita rimas i
Sai lam dipatuduhon denggan basaNa i:
Ai songon hasundutan dao sian purba i
Holang dibaen Ibana sude dosanta i

VERSE 3

Asi roha ni ama marnida anakkonna i
Suman tusi Jahowa marnida na porsea i
Diboto do mulanta na sian tano i
Tudoshon bungabunga tudoshon bulung i
Disi ro habahaba mamintor habang be
Suman tusi do jolma, sai mate do sude.

VERSE 4

Tung asi ni rohaNa sambing do na manongtong i
Saleleng ni lelengna di tonga huriaNa i
Di surgo habangsaNa hinaliangan ni
Sude parhaladoNa na sun badia i
Na sai tongtong mamuji pasangap Tuhan i
Ho pe tondingku puji tongtong goarNa i.

BE 02 - NAENG PUJIONKU HO JAHOWA



VERSE 1

Naeng pujionku Ho Jahowa ai Ho do Debata na tutu i
Sai suru Tondi Parbadia tu au asa hupuji goarMi
Marhitehite Jesus AnakMi asa lomo rohaM di endengki

VERSE 2

Togihon ma au tu AnakMu asa tu Ho ditogu au muse
TondiM pasaorhon tu tondingku Manogu au di dalan na ture
Asa tongtong gok dame rohangki huhut girgir mamuji goarMi.

VERSE 3

Asi rohaM ale Jahowa pamalo au mamuji goarMi
Sai unang asal puas hata ingkon tutu dipuji rohangki
Ho Ama, Anak dohot Tondi i doshon na jongjong au di joloMi

BE 03 - PUJI JAHOWA ALE TONDINGKU



VERSE 1

Puji Jahowa ale tondingku puji Ibana Debatami
Tagan so suda dope bohalhu naeng pujionku basaNa i
Sitompa daging tondi pe ingkon dipuji sasude Haleluya, Haleluya

VERSE 2

Tubu ni jolma do nang na sangap jala na mulak tu tano i
Tahitahina pe laho do monjap molo dibondut tanoman i
Ndang jolma hasonanganki Debata do haposanki Haleluya, Haleluya

VERSE 3

Martua halak na niondingan ni Debatanta Jahowa i
Angka na hot marhaporseaon di Jesus Kristus Tuhanta i
Molo Debata donganmu ndang adong hurang tuamu Haleluya, Haleluya.

BE 04 - SAI PUJI DEBATA



VERSE 1

Sai puji Debata dibaen asi rohaNa
Huhut tongtong basa di nasa tinompaNa
Ria ma hita be mamuji Debata
Ai sesa do nuaeng dosanta i dibaen

VERSE 2
Disuru Debata AnakNa Jesus Kristus
Jadi mansai arga do hita on ditobus
Diporsan Jesus i dosanta sasude
Asa mudarNa i paias hita be.

VERSE 3
Dibahen i tama pujion ni rohanta
Tuhanta Debata nang Jesus pe AnakNa
Nang pangondian i Naung ro tu hita on
Manggonti Jesus i pujion do tongtong

BE 05 - SAI TA PUJI MA JAHOWA



VERSE 1

Sai tapuji ma Jahowa Debatanta na tutu
Tapatimbul ma Amanta Na bonar huhut burju
Binsan hosangki disi Pujionku Tuhanki

VERSE 2
Ndang haposan ni rohanta Dongan na di tano on
Ai jotjot do mubauba Tahi ni rohaninon
Dung i molo mate i Pesan ma tahina i

VERSE 3
Sai martua manang ise Siasahon Debata
Ai dison pe dohot muse Dipasonang Debata
Ala ni haposi ma holan Tuhan Debata

VERSE 4
Ai Ibana do Sitompa Langit dohot tano on
Ro di isi ni sudena Sasude portibi on
Debata haposan i Ai tongtong rohaNa i.

VERSE 5
Ai Ibana pasintongkon Uhum tu na pogos i
Hangoluan ditumpakkon Tu na haleonon i
Nang na hona hilang pe Dipalua do sude

VERSE 6
Sai Ibana patonggorhon Mata na mapitung i
Pangapulon pe dihorhon Di parroha na tungki
Sai diparhamaol tutu Nasa jolma na burju

VERSE 7
Sai Ibana mangondingi Na mabalu i sude
Sai Ibana mangurupi Na tading di lampin pe
Sogot uhumonNa be Na tois roha i sude

VERSE 8
Debatanta do rajanta Salelenglelengna i
Ala ni las ma rohanta Hita na porsea i
Taendehon Debata Rap mandok Haleluya.

BE 06 - PUJI JAHOWA NA SANGAP



VERSE 1

Puji Jahowa na sangap huhut marmulia
Hamu sude na parroha na ringgas na ria
Marpungu be, marolopolop sude, hamu sude manisia

VERSE 2
Puji Jahowa Sigomgom sude parluhutan
Na manogihon ho songon niiring ni tangan
Dohot hosam, songon hombar tu roham sai diramoti Ibana

VERSE 3
Puji Jahowa naung tipak manompa dagingmu
Jala na tongtong manumpak hisar pamatangmu Jotjot do ro
pangurupiNa tu ho, uju na ro hagogotan

VERSE 4
Puji Jahowa situmpak sude ulaonmu
Ai ditumpakhon tu ho tongtong hangoluanmu
Ingot ma i, denggan basaNa do i, tomutomuNa sambing do

VERSE 5
Puji Jahowa tondingku pasangap goarNa
Dohot sude na marhosa mamuji Ibana
I do ture baenon ni hita sude, sai taendehon ma amen.

BE 07 - PUJI HAMU MA ASI NI ROHA



VERSE 1

Puji hamu ma asi ni roha ni Tuhan Jahowa di halak Kristen i
Ai naung diontang sude jolma Tu hangoluan na sora suda

VERSE 2
Tuhan Jahowa panggomgom di sude Nasa parhosa manomba Raja i
Marloksaloksa suruanNa Mamujimuji tongtong goarNa

VERSE 3
Hamu parbegu unang ma tundal be Tu Tuhan Jesus ro ma hamu sude
Ai naung ditongos do hatana Dosa sudena naeng sesaonNa.

VERSE 4
Dohot do bohal dilehon Debata Ndang marnahurang, tuk songon na tama
Udan pe dohot las ni ari Nasa parguna do dipasari

VERSE 5
I pe sai puji dengganbasaNa i asa lam ganda hasangaponNa i
Tongtong do hita ramotanNa On pe tapuji dengganbasaNa.

BE 08 - JAHOWA JAHOWA



VERSE 1

Jahowa, Jahowa, Jahowa Di goarMu ma hasangapon i, Amen, Amen
Pujionnami do tongtong GoarMi di joroMon
Sai naeng dohononku Badia, badia do goarMu Haleluya, Haleluya

VERSE 2
O Jesus, o Jesus, o Jesus GoarMi do Dipuji hami on Amen, amen
Ho do disuru Ama i Na marholong roha i Asa saut malua
Ma hami sian saluhut jea, Pinuji Ho, Pinuji Ho.

VERSE 3
O Tondi, o Tondi, o Tondi Parbadia Pinuji dohot Ho Amen, amen
Na sintong nang na tiur pe Nang na denggan sasude
Ho do manuanhon Tu roha ni sude hajolmaon Haleluya, Haleluya